Këshilli Kushtetues i Francës u shpreh të premten në mbështetje të projektligjit jopopullor që parashikon një rritje të moshës së pensionit, nga 62 në 64 vjeç, duke i dhënë një fitore Presidentit Emmanuel Macron, pas tre muajsh protestash masive kundër reformës, që kanë goditur popullaritetin e tij.
Vendimi pritet të zemërojë sindikatat dhe kritikët e tjerë të reformës, përfshirë protestuesit e mbledhur në qytete të ndryshme në mbarë Francën. Kundërshtarët politikë të Presidentit Macron u zotuan të vazhdojnë të ushtrojnë trysni ndaj qeverisë për të tërhequr projektligjin.
Këshilli hodhi poshtë disa nene të tjera të projektligjit, por jo atë të rritjes së moshës së daljes në pension, që është pika qendrore e planit të zotit Macron dhe pika kryesore që ka shkaktuar protesta në vend.
Tashmë pritet firma e Presidenti Macron dhe ligji hyn në fuqi brenda 15 ditësh.
Në një vendim të veçantë, por të lidhur me këtë çështje, Këshilli hodhi poshtë një kërkesë të ligjvënësve të krahut të majtë, për të lejuar mbajtjen e një referendumi mbi përcaktimin e moshës 62 vjeç, si moshë maksimale zyrtare të daljes në pension. Këshilli do të vendosë për një kërkesë të ngjashme muajin e ardhshëm.
Mes tensionesh në rritje, disa orë përpara vendimit, Presidenti Macron ftoi sindikatat që të takoheshin të martën që vjen, "cilido qoftë vendimi i Këshillit Kushtetues", sikurse shprehej zyra e tij. Muajin e kaluar presidenti nuk pranoi një kërkesë për takim të paraqitur nga sindikatat. Sindikatat kanë qenë organizatore të 12 protestave mbarëkombëtare që nga janari dhe kanë një rol kritik në përpjekjet për të zbutur reagimet ekstreme të protestuesve.
Vendimi i Këshillit të Kushtetutës përmbyll disa muaj debatesh të ashpra në parlament dhe protestash në rrugë, lidhur me çështjen e rritjes së moshës së pensionit.