Autoritetet gjermane ndaluan të martën një sirian, i cili dyshohet se po planifikonte të kryente një sulm me eksploziv. Sipas zyrtarëve gjermanë, personi i ndaluar ishte i motivuar nga bindjet e tij islamiste ekstremiste.
Policia federale tha se 28 vjeçari sirian u arrestua në qytetin verior të Hamburgut.
Hetuesit thanë se i dyshuari u përpoq të siguronte në internet materialet e nevojshme për sulmin, përfshirë një rrip me lëndë eksplozive “për të vënë në shënjestër zona me civilë”.
Policia tha se të dyshuarin e ndihmoi vëllai i tij 24 vjeçar, i cili jeton në qytetin jugor të Kemptenit. Të dyshuarit, emrat e të cilëve ende nuk janë publikuar, ishin të motivuar nga pikëpamjet e tyre “islamiste dhe xhihadiste”.
Autoritetet thonë se nuk kanë informacione mbi objektivat e tyre konkrete për sulmet e planifikuara.
Policia kontrolloi pronat e të dyshuarve në Hamburg dhe Kempten, duke konfiskuar sasi të mëdha provash, përfshirë substanca kimike, thanë zyrtarët. Rreth 250 policë gjermanë u angazhuan në operacionin për ndalimin e tyre.